Jer 13 | NdeIBE | STEP | UJehova wathi kimi: “Hamba uyethenga ibhanti lelineni ubophe ukhalo lwakho ngalo, kodwa lingathinti amanzi.”

Jeremiah 13

Ibhanti leLineni

1 UJehova wathi kimi: “Hamba uyethenga ibhanti lelineni ubophe ukhalo lwakho ngalo, kodwa lingathinti amanzi.”

2 Ngakho ngathenga ibhanti, njengokulaya kukaJehova, ngabopha ukhalo lwami ngalo.

3 Ilizwi likaJehova labuya lafika kimi ngokwesibili lathi: 4 “Thatha ibhanti olithengileyo obophe ngalo ukhalo lwakho, uye ePherathi, khathesi nje ulifihle khona empankeni wamatshe.” 5 Ngakho ngahamba ngayalifihla ePherathi, njengokutsho kukaJehova kimi.

6 Sekudlule izinsuku ezinengi uJehova wathi kimi, “Hamba khathesi ePherathi uyethatha ibhanti engathi lifihle khona.” 7 Ngakho ngaya ePherathi ngagebha lapho engangifihle khona ibhanti, kodwa laselonakele impela lingaselasizo.

8 Lapho-ke kwafika ilizwi likaJehova kimi lisithi: 9 “UJehova uthi: ‘Ngendlela efanayo ngizakuchitha ukuzigqaja kukaJuda lokuzigqaja okukhulu kweJerusalema. 10 Lababantu abangalunganga, abalayo ukulalela amazwi ami, abalandela ubulukhuni bezinhliziyo zabo badinge abanye onkulunkulu ukuba babasebenzele njalo babakhonze, bazakuba njengebhanti leli – bengelasizo loluncane!

11 Ngoba njengebhanti libopha ukhalo lomuntu, ngayibophela kanjalo kimi yonke indlu ka-Israyeli layo yonke indlu kaJuda, kutsho uJehova, ukuba babe ngabantu bami ngenxa yodumo lwami, ukubongwa lokudunyiswa. Kodwa kabalalelanga.’ ”

Izikhumba Zewayini

12 “Batshele uthi: ‘UJehova uNkulunkulu ka-Israyeli uthi: Zonke izikhumba zewayini kumele zigcwaliswe ngewayini.’ Bona bangathi kuwe, ‘Kanti thina kasikwazi yini ukuthi izikhumba zonke kumele zigcwaliswe ngewayini?’ 13 wena uthi kubo, ‘UJehova uthi: ngizabenza badakwe bonke abahlala kulelilizwe, kanye lamakhosi ahlala esihlalweni sobukhosi sikaDavida, abaphristi, abaphrofethi labo bonke abahlala eJerusalema. 14 Ngizabamahlaza omunye komunye, oyise lamadodana ngokufananayo, kutsho uJehova. Angiyikuvumela isihawu loba umusa kumbe uzwelo ukuba kungivimbele ukubabhubhisa.’ ”

Isisongo sokuthunjwa

15 Zwanini lilalele, lingazigqaji, ngoba uJehova usekhulumile.

16 Dumisani uJehova uNkulunkulu wenu engakalethi umnyama, izinyawo zenu zingakakhubeki emaqaqeni asesembeswa ngumnyama. Lilindele ukukhanya, kodwa yena uzakwenza kube ngumnyama olohlonzi, akuphendule kube ngumnyama omkhulu.

17 Kodwa uma lingalaleli, ngizakhalela ensitha ngenxa yokuzigqaja kwenu; amehlo ami azalila kabuhlungu, ageleze izinyembezi, ngoba umhlambi kaJehova uzathunjwa.

18 Tshono enkosini laseNdlovukazini uthi, “Yehlani ezihlalweni zenu zobukhosi lize phansi, ngoba imiqhele yenu emihle kakhulu izakuwa emakhanda enu.”

19 Amadolobho aseNegebi azavalwa, njalo akuyikuba khona ozawavula. UJuda wonke uzathathwa asiwe ekuthunjweni, uzasiwa ekuthunjweni ngokupheleleyo.

20 Phakamisani amehlo enu libone labo abavela enyakatho. Ungaphi umhlambi ababewugcinisiwe, izimvu elalizazisa ngazo na?

21 Lizakuthini lapho uJehova esebabeka phezu kwenu labo elabenza baba ngabangane benu abaqakathekileyo na? Kaliyikubanjwa yibuhlungu obufana lobowesifazana ehelelwa na?

22 Njalo uma uzibuza usithi, “Kungani lokhu kwenzakele kimi na? – kungenxa yezono zakho ezinengi ukuthi izidwaba zakho zidatshulwe lomzimba wakho waphathwa kubi.

23 UmTopiya angaliguqula yini ijwabu lakhe loba ingwe iguqule amabala ayo na? Lani lingeke lenze okuhle lina selajwayela ukwenza okubi.

24 “Ngizalihlakaza njengamakhoba ephetshulwa ngumoya wasenkangala.

25 Lokhu yikho okungokwenu, isabelo engilimisele sona,” kutsho uJehova, “ngoba lingikhohliwe lathemba onkulunkulu bamanga.

26 Ngizaphekulela izidwaba zakho ebusweni bakho ukuba kubonakale ihlazo lakho –

27 ubufebe bakho lokububuliswa yisigwebo, ukuwula kwakho ungelanhloni! Ngizibonile izenzo zakho ezenyanyekayo phezu kwamaqaqa lasegangeni. Maye kuwe, wena Jerusalema! Koze kube nini ungahlambulukanga na?”